As medidas para "mellorar" a calidade educativa no rural son insuficientes e mesmo chegan a non cumprirse

Un dos obxectivos da Rede Galega de Educación e Desenvolvemento Rural é o de emprender accións conxuntas orientadas a unha atinada política de desenvolvemento global do país na que se integre un plan de educación específico para o rural galego. Por ese motivo, no ano 2022, fundamos o grupo de traballo PEER: Plan Específico de Educación no Rural.
No marco do mesmo, creamos, en 2023, diversos equipos de traballo, chamándose un deles Equipo de Planificación Educativa no Rural.
Ese equipo elaborou uns meses despois un documento con algunhas das súas reivindicacións iniciais, coincidindo que gran parte do que recollían, no bloque relativo a un acordo de rateos específico no rural para grupos internivel, estaba tamén recollido no acordo entre varias organizacións sindicais (sen incluír á organización sindical maioritaria en Galicia, moi crítica co pacto) coa Xunta de Galicia o 11 de outubro de 2023 (publicado en xaneiro deste ano), ao facer referencia ese acordo a que, nas aulas que escolaricen alumnado de diferentes niveis, ciclos e/ou etapas educativas serán de aplicación os rateos recollidas no Acordo de agrupamentos do alumnado, do 10 de xullo de 2009.
Por ese motivo, e malia que ese acordo deixaba sen introducir cambios importantes (por exemplo, non modificaba nada a situación en secundaria, bacharelato nin FP), ese equipo celebrou as melloras que incluía, á par que se amosaba crítico con algúns dos prazos de aplicación e escéptico con respecto a como ía ser levado á práctica.
Nove meses despois da publicación do mesmo, elaboramos a infografía que publicamos á dereita, para dar á coñecer á cidadanía algúns dos puntos dese acordo (na metade de arriba) e, sobre todo, para denunciar publicamente que o mesmo non se está a cumprir.