DEFENSA DA EDUCACIÓN NO RURAL

É necesaria unha planificación consecuente cos principios dunha educación de calidade e integrada nun proxecto global de desenvolvemento do mundo rural galego. Trataríase dunha planificación que dese prioridade á resposta aos dereitos da infancia a recibir atención educativa no seu medio e recoñecese a utilidade social da escola no seu papel de revitalizadora das comunidades rurais.

POLÍTICAS EDUCATIVAS

BANCO DE BOAS PRÁCTICAS

Foto
No libro A historia da pita que elixiu a nosa escola pra poñer, os nenos falan por si mesmos e ofrécennos algo novidoso, pois consiste nun traballo escolar espontáneo baseado na crónica dun feito real: unha pita que chega a ser a motivación  das actividades dos escolinos polo feito de ser a escola o seu neal.
En cinco tempadas escolares (que abarcan os cursos 1975-1978) os pícaros cóntannos a visita case diaria da pita de Os Prados ("fermosa, grande, fachendosa, de cor rubio e  con algunhas pencas"..." dunha raza do mellor e  moi poñedora") e as vivencias e sentimentos cara a ela. A verdadeira narración da historia (realidade) compleméntase cun mundo de  fantasía (o mundo dos nenos) expresado nos debuxos, perfectos compañeiros dos textos, que enchen de cor e significación o relato. O libro complétase coas aportacións da mestra. Nestas, amais de contarnos a realidade e situación da escola de Os Prados, manifesta  a súa concepción do ensino aberto ao medio, que parta da  experiencia e necesidade dos nenos, no que estes "aprendan dun xeito  natural", lonxe de  ríxidos encadramentos.

A idea de elaborar Chirlo Merlo nace nun grupo de tres profesores/as de Educación Infantil do CPI de Ponte Carreira (Frades), no curso escolar 1984/85. O alumnado de infantil procedía do ámbito rural e utilizaba o galego como idioma normal. Porén, os métodos que se vendían no mercado estaban todos en castelán, agás algún que non enchía as espectativas metodolóxicas. Detectábase a necesidade de dispoñer de materiais para poder ensinar a ler e escribir en galego e cunha fundamentación máis natural, con raíces en Freinet. Así, estes profesores tomaron a decisión de reunirse diariamente para elaborar fichas e contos que permitisen un ensino da lectoescritura máis acorde co que pensaban. O material elaborado cada día era fotocopiado para ser utilizado na aula. Estas primeiras fichas eran artesanais e en branco e negro, pero podían ser coloreadas e redibuxadas polos pequenos, o que lles daba un encanto especial e un nivel de vivenciación que non se conseguía coas fichas estándar. Así naceron os primeiros libros de contos de Chirlo Merlo.
Pasado certo tempo, outros profesores e profesoras interesáronse por estes materiais e quixeron utilizalos tamén nas súas aulas. Por esta razón,  comezou un proceso de subministración de fotocopias do material xa elaborado a outros/as profesores/as. Este proceso foise incrementando e chegou un momento no que nos prantexamos a posibilidade de editalo, o cal supoñía reelaboralo e, sobre todo, traballar cun grupo de colaboradores que puidesen testalo nas escolas para pulilo antes de ser publicado.
A publicación foi realizada pola editorial Ir Indo no ano 1991. Actualmente pódese consultar todo o material na web http://chirlomerlo.blogspot.com.
Foto
No curso 2020-21, fixemos un proxecto sobre GALEGOS ARREDOR DO MUNDO. Arxentina, a Patagonia chilena, Borneo, Whashinton, Xapón ou Cambodia... entre outros, foron os países que coñecemos da man de galegos e galegas (amigos ou familiares) que ou ben viven alí ou foron de viaxe e nos gravaron vídeos e fotos. Para ver algunhas das entradas, fai clic sobre a foto que aparece á dereita.

Outro proxecto moi fermoso foi tamén un sobre CONCIENCIACIÓN E BENESTAR ANIMAL. Recibimos na escola a visita de xente relacionada con protectoras e santuarios animais, así como persoas que rescataron animais en condicións extremas. Para min, sendo vexetariana e animalista, foi unha das mellores experiencias vitais como mestra que levo feito con nenos e nenas ata o de agora. Rematamos cun mercadiño benéfico para recadar cartos para Santuario Vacaloura, do que son socia, no que participaron todas as familias. Podes ver un resumo, se fas clic sobre a foto que aparece á esquerda.

Fixemos traballos sobre Galicia en varias ocasións e con diferentes temáticas (cerámica, montes, ríos, faros, illas...), contando con moita colaboración sempre por parte das familias. Poden verse facendo clic sobre a imaxe da dereita.

Algúns traballiños que fixemos sobre os Maios pódense ver facendo clic sobre a imaxe da esquerda.