NACE O ESPAZO EN LIÑA DA REDE DO RURAL

Prezad@s adherentes da Rede do Rural (Rede Galega de Educación e Desenvolvemento Rural):

Saúde a todas e todos. Xa pasou tempo desde a última vez en que a coordinadora da Rede nos puxemos en contacto con vós. En verdade que non foron propicios os últimos meses en termos comunitarios, ao que se sumou o noso pouco tempo de dispoñibilidade para sacar adiante os asuntos do noso colectivo.

En todo caso estivemos traballando de maneira silandeira para (sobre todo) poñermos o pé no mundo dixital, obxectivo que por fin se fai realidade hoxe, día 13 de decembro, a Noite da Luz, cando mingua a noite e medra o día, arcano e hipotético fin/arranque de ciclo solar anual, momento de referencia para os nosos devanceiros rurais, relacionado cos cultos naturalistas e cósmicos da cultura castrexa, e que está nos alicerces antropolóxicos do vencello espiritual que galegas e galegos mantemos coa terra.

En definitiva, que xa podedes entrar desde data tan sinalada no espazo web da Rede (rededorural.org), onde atoparedes un bo feixe de recursos e a posibilidade de ampliar contactos e estreitarmos lazos entre nós. Loxicamente a páxina está en construción e entre todas e todos debemos enchela de contido, para o que vos pedimos axuda, mesmo para valorar criticamente (e a poder ser, de maneira construtiva) a súa estrutura. Agradecemos que enviedes todas as vosas achegas a redegalegaruralpaxina@gmail.com.

Agardemos que o esperanzador resoar telúrico deste 13 de decembro nos traia tamén bos augurios a todas e todos de cara á superación da pandemia. Coidádevos moito e boas festas de fin de ano.


A coordinadora da Rede do Rural